प्रतापराव गुजरांस महाराजांचं आज्ञापत्र सुटलं. "सर्ववत स्वराज्यावर वारंवार चालून येणाऱ्या गनिमास गर्दीस मिळवल्याविना आम्हास रायगडावर तोंड दाखवू नका ". आणि मग .....
म्यानातून उसळे तरवारीची पात
वेडात मराठे वीर दौडले सात
| सरसेनापती प्रतापराव गुजर |
ते फिरता बाजूस डोळे किंचित ओले
सरदार सहा सरसावूनी उठले शेले
रिकिबीत टाकले पाय पेलेले भाले
उसळले धुळीचे मेघ सात निमिषात
आश्चर्यमुग्ध टाकून मागुती सेना
अपमान बुजविण्या सात अर्पुनी माना
छावणीत शिरले थेट भेट गनिमांना
कोसळल्या उल्का जळत सात दर्यात
खालून आग वर आग आग बाजूनी
समशेर उसळली सहस्त्र क्रूर इमानी
गर्दीत लोपले सात जीव ते मानी
खग सात जळाले अभिमानी वणव्यात
दगडावर दिसतील अजुनी तेथल्या टाचा
ओढ्यात तरंगे अजुनी रंग रक्ताचा
क्षितिजावर दिसतो अजुनी मेघ मातीचा
अद्याप विराणी कुणी वाऱ्यावर गात
No comments:
Post a Comment